राष्ट्रीय संग्रहालय, दिल्ली (नॅशनल म्युझियम, न्यू दिल्ली)

भारतातलं सर्वांत मोठं संग्रहालय म्हणून नवी दिल्लीच्या राजपथावर मोठ्या ऐटीत उभं असलेलं राष्ट्रीय संग्रहालय सगळ्यांचं लक्ष वेधून घेतं. या संग्रहालयात अगदी पुरातन काळापासून ते आजच्या मॉडर्न काळातल्या वस्तू पाहायला मिळतात. या संग्रहालयात आपल्याला पुढील विभागांची माहिती मिळते, जसं पुरातत्व, मानवशास्त्र, डेकोरेटिव्ह आर्ट्स, आंथ्रपोलॉजी, शस्त्रास्त्र, फाइन आर्ट, जुन्या काळातले दागिने, नाणी आणि पदके, प्री कोलंबियन आणि पाश्चात्य कला, वेगवेगळी हस्तलिखितं. पुरातन वस्तूंचं भांडार असलेल्या या संग्रहालयाला वेळ काढून एक तरी भेट द्यायलाच हवी.

भारताच्या केंद्रीय सांस्कृतिक मंत्रालयांतर्गत कार्यरत, दिल्लीच्या १० जनपथ मार्गावर असलेले राष्ट्रीय संग्रहालय दिल्ली (नॅशनल म्युझियम न्यू् दिल्ली) हे देशातील सर्वोत्कृष्ट संग्रहालयांपैकी एक आहे.

१९४९ मध्ये दिल्लीत स्थापित झालेल्या या संग्रहालयात अनेकविध वस्तूंचे प्रदर्शन पाहायला मिळते. ऐतिहासिक काळापासून आजच्या आधुनिक काळापर्यंत सर्व बाबींशी संलग्नित असलेल्या वस्तूंचे हे एक भव्य संग्रहालय समजले जाते. आजघडीला या संग्रहालयात भारतीय आणि विदेशी अशा एकत्रित जवळपास दोन लाख वस्तू संग्रहित आहेत.